திருப்பரங்கிரி

'பாம்பன்' ஸ்ரீமத் குமரகுருதாச சுவாமிகள் அருளிய
திருவலங்க திரட்டு
- முதற்கண்டம்* -
இசைத்தமிழ் (இரண்டாம் மண்டலம்)
பாடல் - திருப்பரங்கிரி

பாடல் - திருப்பரங்கிரி

பண் - பஞ்சமம்
தேவாரப் பாடல் - தானெனை முன்படைத்தான்
இராகம் - ஆகிரி
தாளம் - ரூபகம்

எந்தையே யிறையே யிணையரு ளிலையே
      லிங்கியா னுய்ந்திலே னந்தோ
சிந்தைசேர் வானே திகழ்விழுப் பொருளே
      திருப்பரங் கிரியுறை சிவனே
பந்தமே போக்கிப் பதவரு ளாக்கிப்
      பகலிர வணவிடா நிலையிற்
சந்ததஞ் சேர்க்கத் தயவுசெய் யாயோ
      சரவண சுயம்பெரு மாளே ..  1

ஏசுறா வருளா மிதநல மிலையே
      லிங்கியா னுய்ந்திலே னந்தோ
தேசுசே ரெழிலே திகழ்விழுப் பொருளே
      திருப்பரங் கிரியுறை சிவனே
பாசமே போக்கிப் பதவரு ளாக்கிப்
      பரபரி பூரண நிலையில்
நேசமாய் நிலைக்கச் செயும்வகை புரியாய்
      நிகழயிற் சுயம்பெரு மாளே ..  2

இன்றுநா ளையெனலி லாவருளிலையே
      லிங்கியா னுய்ந்திலே னந்தோ
சென்றுதே யாவை திகழ்விழுப் பொருளே
      திருப்பரங் கிரியுறை சிவனே
அன்றுநீ சொனவா றடிமையை யழைத்துன்
      னடித்தொழும் பாயுறும் வேலை
ஒன்றையே விதிப்பா யயிற்படை பிடித்தே
      யொளிர்சுப சுயம்பொரு மாளே ..  3

எங்கணா யகநீ யிடுமரு ளிலையே
      லிங்கியா னுய்ந்திலே னந்தோ
திங்களா னனனே திகழ்விழுப் பொருளே
      திருப்பரங் கிரியுறை சிவனே
கங்குல்போ லுளவா ணவமல மறவே
      கருணைசெய் தேயெனை யாளாய்
அங்கணா புரணா வணியலர்ச் சரணா
      வயிலுடைச் சுயம்பெரு மாளே ..  4

இசையியல் கூத்தென் றுளதமிழ் நாதா
      விங்கியா னுய்ந்திலே னந்தோ
திசைப்புக ழாதீ திகழ்விழுப் பொருளே
      திருப்பரங் கிரியுறை சிவனே
வசைதரு மாமும் மலமற நீதான்
      வருவது கடினமெ னாதே
உசிதமொ டுதடுத் தாள்வது கடன்கா
      ணுயரயிற் சுயம்பெரு மாளே ..  5

இச்சையான் மறற்கே றடிமையென் றானா
      லிங்கியா னுய்ந்திலே னந்தோ
செச்சைசேர் பிணையாய் திகழ்விழுப் பொருளே
      திருப்பரங் கிரியுறை சிவனே
பட்சமே யுரித்தாய் பழமல மகற்றிப்
      பகரரு மானந்த நிலையில்
நிச்சயா திக்கமா நிறுத்தவா ராயோ
      நெடுமயிற் சுயம்பெரு மாளே ..  6

என்னையாள் வானே யேரரு ளிலையே
      லிங்கியா னுய்ந்திலே னந்தோ
தென்னர்மா கூற்றே திகழ்விழுப் பொருளே
      திருப்பரங் கிரியுறை சிவனே
இன்னலா மைவகைப் பாசவல் லொழித்துன்
      னிணையடி யென்முடி சூட்டி
நன்னலங் கொளற்குப் பன்னவா ராயோ
      நறுமயிற் சுயம்பெரு மாளே ..  7

எம்பிரா னேயுன் னன்பனாக் காயே
      லிங்கியா னுய்ந்திலே னந்தோ
செம்பொருட் கடலே திகழ்விழுப் பொருளே
      திருப்பரங் கிரியுறை சிவனே
நம்பினே னுனையே நைந்தறா மாயை
      நலிவுறத் தடுத்தா ளாயோ
உம்பர்கா வலனே யுமையவள் சுதனே
      யுணர்வயிற் சுயம்பெருமாளே ..  8

இஞ்சையா ணவப்பாம் பின்னமுங் கறிக்கி
      னிங்கியா னுய்ந்திலே னந்தோ
செஞ்சடா னனனே திகழ்விழுப் பொருளே
      திருப்பரங் கிரியுறை சிவனே
அஞ்சிடா யெனவே யாதா¢த் தணைத்துன்
      னடித்தொழும் பாக்கவா ராயோ
மஞ்சுவாழ் கயப்பெண் மயன்மண வாளா
      வடிவயிற் சுயம்பெரு மாளே ..  9

இட்டமா மருடா னில்லையே யாயி
      னிங்கியா னுய்ந்திலே னந்தோ
சிட்டர்பா லனனே திகழ்விழுப் பொருளே
      திருப்பரங் கிரியுறை சிவனே
கட்டுமா ணவமாங் கயிற்றனை யறுத்தென்
      கவலையின் றிறங்கடி யாயோ
மட்டிலா வகுப்பை யுரைத்தவ னிறைவா
      மதியயிற் சுயம்பெரு மாளே ..  10